.png)
Ұсыныстар арнаулы салық режимі мен чек қалыптастыру кезінде қолданылатын қызметтер анықтамалығына қатысты. Олар Астанада өткен платформалық жұмыспен қамту мәселелері жөніндегі жұмыс тобының алғашқы отырысында талқыланды.
Кездесуге еңбек және халықты әлеуметтік қорғау министрі Асқарбек Ертаев, мемлекеттік органдардың, «Атамекен» ҰКП мен ірі цифрлық платформалардың өкілдері қатысты. Топтың негізгі міндеті — интернет‑платформалар арқылы жұмыс істеудің түсінікті шарттарын қалыптастыру, әлеуметтік кепілдіктерді кеңейту және жұмыспен қамтудың осы форматының икемділігін сақтау.
Чек қалыптастыруды жеңілдету ұсынылды
Жұмыс тобы өзін‑өзі жұмыспен қамтығандар арнаулы салық режимі аясында айналыса алатын қызмет түрлерінің тізбесін кеңейту мүмкіндігін қарастырып жатыр.
Сонымен қатар қызметтер анықтамалығын жаңарту ұсынылды. Бұл өзін‑өзі жұмыспен қамтығандарға көрсетілген қызметті дәлірек көрсетуге және чектерді оңай рәсімдеуге көмектеседі.
Платформалық жұмыспен қамту мен еңбек қатынастарын ажырататын өлшемшарттар әзірленеді
Отырысқа қатысушылар цифрлық платформа мен орындаушы арасындағы нақты өзара әрекетке негізделген бірыңғай өлшемшарттар әзірлеуді ұсынды.
Олар мұндай өзара қарым‑қатынастың қай кезде еңбек қатынастарына жататынын, ал қай кезде азаматтық заңнама аясында реттелетінін анықтауға көмектеседі.
Жаңа қағидалар ақпарат алмасу мен әлеуметтік төлемдерді қамтиды
Отырыста Әлеуметтік кодекске сәйкес әзірленген платформалық жұмыспен қамтуды жүзеге асыру қағидаларының жобасы да қаралды.
Құжат мемлекеттік органдар мен цифрлық платформалар арасындағы ақпарат алмасуды, дербес деректерді қорғауды, кәсіптік тәуекелдерді басқаруды және әлеуметтік төлемдерді төлеу тәртібін реттейді.
Жұмыс тобы платформалық жұмыспен қамтуды реттеу және өзін‑өзі жұмыспен қамтығандардың ресми жұмыс істеуіне жағдай жасау жөніндегі ұсыныстарды пысықтауды жалғастырады.