Таңбалау деректері тегін беруге арналған 27 мыңнан астам дәрі-дәрмектің сатылғанын анықтауға көмектесті

Фото дереккөзі: pharmreviews.kz

Бірыңғай тауарларды таңбалау оператордың жоба жетекшісі Анар Карибаева «ФАРМБЮДЖЕТ ҚАЗАҚСТАН 2027» салалық конференциясында сөз сөйледі. «Бизнес пен реттеушілердің тікелей диалогы» атты дөңгелек үстелде спикер Тауарларды таңбалау және қадағалаудың цифрлық жүйесінің (ТТҚ ЦЖ) жұмысы туралы деректерді таныстырды. 2026 жылғы 14 қыркүйектегі жағдай бойынша Қазақстанда 1,15 млрд-тан астам дәрі-дәрмек қаптамасы таңбаланды.

ТТҚ ЦЖ деректерін талдау нәтижесінде дәріханаларда ТМККК және МӘМС шеңберінде пациенттерді тегін қамтамасыз етуге арналған 27 мыңнан астам дәрі-дәрмек қаптамасының сатылғаны анықталды. Сатылым сомасы 46,4 млн теңгені құрады, ал мемлекетке келтірілуі мүмкін залал 36,2 млн теңгеге бағаланып отыр. Сондай-ақ жүйе жарамдылық мерзімі өткен дәрі-дәрмекті сатудың 7,7 мыңнан астам жағдайын тіркеді. Жүйе анықтаған ауытқулар туралы мәліметтер тексеру жүргізу үшін уәкілетті органдарға беріледі.

«Цифрлық таңбалау дәрі-дәрмектің өндірілген немесе импортталған сәтінен бастап дәріханада сатылғанға және медициналық ұйымда пайдаланылғанға дейінгі қозғалысын бақылауға мүмкіндік береді. Осы деректердің арқасында біз жарамдылық мерзімі өткен препараттардың, сондай-ақ пациенттерді тегін қамтамасыз етуге арналған дәрі-дәрмекті сату жағдайларын анықтаймыз. Мұндай жағдайлар туралы мәліметтер тексеру жүргізу үшін уәкілетті органдарға беріледі», – деп атап өтті Анар Карибаева.

Салалық конференцияда талқыланған жеке тақырыптардың бірі айналымға қатысушылар қалыптастырып, жүйеге енгізетін деректердің сапасы болды. Бірыңғай тауарларды таңбалау және қадағалау операторы мен Денсаулық сақтау министрлігі қате толтырылған құжаттарды автоматты түрде қабылдамауға мүмкіндік беретін қатаң форматтық-логикалық бақылауды енгізу мәселесін талқылауда.