Бірыңғай оператор тауар нарықтарының цифрлық инфрақұрылымын дамытудағы халықаралық тәжірибені зерделеді

Бірыңғай тауарларды таңбалау мен қадағалау операторының өкілдері ҚХР-дың Ханчжоу және Иу қалаларына барған жұмыс сапары аясында электрондық коммерцияны, цифрлық платформаларды және халықаралық логистиканы дамыту тәжірибесімен танысты.

Делегация Қытайдың электрондық коммерция экожүйесінің негізгі элементтерін, соның ішінде кадрлар даярлау, e-commerce саласында жасанды интеллектіні қолдану, тікелей онлайн-сауданы (live commerce) ұйымдастыру және тауар ағынын басқарудағы цифрлық шешімдердің рөлін егжей-тегжейлі зерттеді.

Сонымен қатар халықаралық логистика мен жеткізу тізбегін басқару мәселелеріне ерекше назар аударылды. Оператор өкілдері тауар партияларын шоғырландыру, қойма және тарату инфрақұрылымы, сондай-ақ өнімді сақтау, өңдеу және жеткізу процестерін автоматтандыру тәсілдерін қарастырды. Салалық компаниялар мен логистикалық хабтарға бару барысында трансшекаралық тасымалды тиімді ұйымдастыру және операциялық шығындарды азайту жолдары зерделенді.

Бұдан бөлек, делегация жетекші цифрлық платформалар мен экожүйелердің жұмысымен танысты. Оның ішінде өндірушілердің халықаралық нарықтарға шығуына арналған шешімдер, сауданы басқару және тауарды ілгерілету құралдары, сондай-ақ контент жасау және тұтынушылық сұранысты талдау технологиялары бар.

Зерттелген тәжірибе Қазақстанның цифрлық экожүйесін одан әрі дамыту тұрғысынан қарастырылуда. Бүгінде тауарларды таңбалау мен қадағалау жүйесі елімізде іргелі инфрақұрылымдық элементтердің бірі ретінде қалыптасып келеді. Үздік халықаралық тәжірибені енгізу тауар ағынының ашықтығын арттыруға, деректер сапасын жақсартуға және мемлекет, бизнес пен цифрлық платформалар арасындағы өзара іс-қимылды нығайтуға мүмкіндік береді.

«Бүгінде Бірыңғай оператордың портфелінде тауар айналымының біртұтас цифрлық контурын құрайтын бірқатар маңызды жобалар жинақталған. Бұл, ең алдымен, сенімді әрі біріздендірілген деректер көзі ретіндегі Ұлттық тауарлар каталогы, сондай-ақ отандық өндірушілер үшін цифрлық өткізу арналарын дамытуға бағытталған «Агромаркет» жобасы. Қытайға жасалған сапар бізге озық шешімдермен танысып қана қоймай, электрондық коммерция мен логистиканың ауқымды үлгілері іс жүзінде қалай жұмыс істейтінін көруге мүмкіндік берді. Біз бұл тәжірибені Қазақстанға бейімдеп, жобаларымыздың тиімділігін арттыру үшін қолданбалы құрал ретінде қарастырамыз. Мұндағы басты мақсат - бөлек құралдарды көшіру емес, цифрлық платформалар, логистикалық инфрақұрылым және мемлекеттік жүйелер арасындағы синергияны қалыптастыру», - деп атап өтті Бірыңғай оператордың бас директоры Бикеш Құрманғалиева.

Сапар барысында жинақталған тәжірибені оператордың цифрлық шешімдерін, соның ішінде логистикалық тәсілдерді жетілдіру, платформалық жүйелермен интеграциялау және нарық қатысушыларымен жұмыс сапасын арттыру бағытында қолдану жоспарланып отыр.