.png)
Соңғы үш жылда Қазақстандағы интернет-алаяқтық саны 40%-ға азайып, мұндай қылмыстардың ашылу деңгейі 29,9%-ға өсті.
2026 жылдың басынан бері елде интернет-алаяқтықтың 14 414 дерегі тіркелді. Бұл өткен жылдың сәйкес кезеңімен салыстырғанда 13%-ға аз. Жәбірленушілерге 5,9 млрд ₸ өтелді.
Антифрод-орталық 117 млрд ₸ ұрлануының алдын алды
Алаяқтықпен күресудің негізгі құралдарының бірі Ұлттық антифрод-орталық болды. Ол 2024 жылғы шілдеден бері жұмыс істейді және 200-ден астам қатысушыны біріктіреді. Олардың қатарында банктер, төлем ұйымдары, мемлекеттік және құқық қорғау органдары, сондай-ақ байланыс операторлары бар.
Екі жыл ішінде жүйеде 180 мыңға жуық күдікті оқиға тіркелді. Деректер алмасудың арқасында банктер 117 млрд ₸-дан астам қаражаттың ұрлануына жол бермеді, ал зардап шеккендерге 578,5 млн ₸-дан астам қаражат қайтарылды.
Антифрод-орталық қатысушыларға күдікті операциялар туралы ақпаратты жедел алмасып, алаяқтар қаражатты шығарып үлгергенге дейін бұғаттауға мүмкіндік береді.
Қазақстанда дербес деректерді қорғау күшейтілді
Елде дербес деректер мен цифрлық инфрақұрылымды қорғауға арналған жаңа талаптар қолданылады. Ұйымдар деректердің таралып кетуі туралы азаматтар мен мемлекеттік органдарға хабарлауға міндетті.
Медициналық, банктік және басқа да құпия ақпарат сақталған дерекқорларға кіру үшін биометриялық аутентификация қарастырылған. Цифрлық нысандардың иелері де жыл сайын киберқауіпсіздік аудитін жүргізуге тиіс.
2024 жылдан бері 648 жоспардан тыс тексеру жүргізілді. Оның 480-і ақпараттық қауіпсіздікке, 168-і дербес деректерді қорғауға қатысты болды.
Тегін қорғаныс сервистері қолжетімді
Азаматтар eGov.kz порталы мен eGov Mobile қосымшасындағы «Стоп-кредит» сервисін пайдалана алады. Ол несие рәсімдеуге ерікті түрде тыйым қоюға мүмкіндік береді. 2026 жылғы 1 маусымға дейін сервис 6,3 млн рет пайдаланылды.
Сондай-ақ дербес деректерге қолжетімділікті бақылау сервисі және ақпараттың ықтимал таралуы мен фишингтік сілтемелерді тексеруге арналған NomadGuard платформасы қолжетімді.
Мамандар SMS-кодтарды, құпиясөздер мен банк карталарының деректерін бөгде адамдарға бермеуге, сілтемелерді ашпас бұрын тексеруге және екі факторлы аутентификацияны пайдалануға кеңес береді.