.png)
Қазақстан Президенті Қасым-Жомарт Тоқаев пен Әзербайжан Президенті Ильхам Әлиев Транскаспий талшықты-оптикалық кабель желісін ресми түрде ашты.
Рәсім 15 қазанда Бакуде онлайн форматта өтті.
Кабель Ақтау мен Сумгайытты байланыстырды
Кабель Каспий теңізінің түбімен Ақтау мен Сумгайыт арасында тартылды. Оның ұзындығы шамамен 380 км, ал өткізу қабілеті секундына 400 терабиттен асады.
Жоба «Цифрлық Жібек жолы» бастамасы аясында жүзеге асырылды. Желі Қазақстан мен Әзербайжан арасында деректерді тікелей тасымалдау бағытын қалыптастырады.
.png)
Деректерді Азиядан Еуропаға тасымалдауға болады
Жаңа цифрлық бағыт Қытай мен Орталық Азия елдерінен Еуропаға деректерді Қазақстан, Әзербайжан және Грузия арқылы тасымалдауға мүмкіндік береді. Одан әрі трафик Қара теңіз немесе Түркия арқылы өтеді.
Желі Орта дәліздің көлік бағыты ретіндегі ғана емес, халықаралық деректер алмасу арнасы ретіндегі маңызын да арттырады деп күтілуде.
Желі цифрлық инфрақұрылымды дамытуға мүмкіндік береді
Кабельдің іске қосылуы Азия мен Еуропа арасындағы цифрлық байланыстың тұрақтылығын арттыруға тиіс. еЖоба деректерді өңдеу орталықтарына, бұлттық сервистерге және жасанды интеллектке арналған есептеу қуаттарына инвестиция тартуға да жағдай жасайды.