Қазақстан желілік дайындық индексі бойынша Орталық Азияда бірінші орын алды

Қазақстан Network Readiness Index 2025 желілік дайындық индексінде 127 елдің арасында 65-орын алып, мүмкін болған 100 балдың 49,1-ін жинады.

Рейтингке енген Орталық Азия елдері арасында бұл — ең жоғары нәтиже. Өзбекстан 46,5 балмен 72-орынға, Қырғызстан 42,4 балмен 90-орынға орналасты. Тәжікстан мен Түрікменстан зерттеуге енген жоқ.

Network Readiness Index рейтингін Portulans Institute әзірлейді. Ол елдердің цифрлық технологияларды пайдалануға дайындығын 53 көрсеткіш бойынша бағалайды.

Бағалау төрт бағыттан тұрады: технологиялар, адамдар, басқару және цифрландырудың экономика мен қоғамға ықпалы.

Әлемдік рейтингте АҚШ бірінші орын алды. Одан кейін Финляндия мен Сингапур орналасты.

«Адамдар» бағыты бойынша Қазақстан Өзбекстан мен Қырғызстанды басып озып, 66-орын алды.

Ел цифрлық мемлекеттік қызметтерді дамытуда ең жоғары нәтижелердің бірін көрсетті. Мемлекеттік онлайн-сервистерді дамыту бойынша Қазақстан әлемде 10-орын, ал мемлекеттік органдардың деректермен жұмыс істеу мүмкіндіктері бойынша 25-орын алды.

Қазақстан мектептердің интернетке қолжетімділігі бойынша әлемде бірінші орынға шықты. Мобильді тарифтердің қолжетімділігі бойынша ел 20-орынға, интернет арналарының халықаралық өткізу қабілеті бойынша 34-орынға орналасты.

Технологиялар бағыты бойынша Қазақстан 81-орын алды. Өзбекстан 75-орынға орналасып, жоғары нәтиже көрсетті. Атап айтқанда, ел талшықты-оптикалық қосылымдардың таралуы бойынша жетінші орын алды.

Цифрландырудың экономикаға, өмір сапасына және тұрақты даму мақсаттарына қол жеткізуге әсерін бағалайтын «Ықпал» бағыты бойынша Қырғызстан 54-орынға, Қазақстан 56-орынға орналасты.

Қазақстан Орталық Азиядағы осы үш елдің арасында «Басқару» және «Ықпал» бағыттары бойынша әлемдік рейтингтің бірінші жартысына енген жалғыз мемлекет болып қалды.

Білім беру жүйесіндегі ақпараттық-коммуникациялық технологиялар дағдылары бойынша Қазақстан 107-орын алды. Бұл көрсеткіш бойынша Өзбекстан 76-орынға, Қырғызстан 83-орынға орналасты.

Рейтинг Қазақстанның өңірдегі басымдығы әрбір жеке көрсеткіш бойынша көшбасшылықтан емес, цифрлық дамудың бірнеше бағыты бойынша салыстырмалы түрде жоғары нәтижелерден қалыптасқанын көрсетеді.